Talabalar bilan ishlash bo‘limi

1. Talabalar bilan ishlash bo‘limi universitetning tarkibiy bo‘linmasi bo‘lib, O‘zbekiston davlat jismoniy tarbiya va sport universiteti (keyingi о‘rinlаrdа “Universitet” deb yuritiladi) Kengashining 2024-уil 31-yanvardagi 6-sonli qaroriga asosan tashkil etilgan.

2. Talabalar bilan ishlash bo‘limi (keyingi o‘rinlarda “Bo‘lim” deb yuritiladi) o‘quv jarayoni rivojlangan xorijiy mamlakatlar universitetlari tajribasini o‘rgangan holda, universitetda talabalarning o‘quv faoliyatiga doir hujjatlar hisobini yuritish orqali shaxsiy yig‘ma jildlarini shakllantirish, tegishli buyruqlarni rasmiylashtirish va ijrosini nazorat qilish, talabalarga akademik (transkript) va boshqa turdagi ma’lumotnomalar berish, ularga ta’lim yo‘nalishlari va shakllari  haqidagi ma’lumotnomalarni taqdim etish, HEMIS axborot tizimiga talabalarni ro‘yxatga qo‘yish, talabalarning savollariga javob berish hamda ularga sifatli va munosib xizmat ko‘rsatish vazifalarini amalga oshiruvchi tarkibiy tuzilma hisoblanadi. Bo‘limning tarkibi 1 nafar bo‘lim boshlig‘i, 3 nafar bosh mutaxassis,   3 nafar etakchi mutaxassis va 1 nafar dispetcherdan iborat.

Bo‘lim Ofis registratori xizmatlari boshqarmasi tarkibida bo‘lib, u Ofis registratori xizmatlari boshqarma boshlig‘iga bo‘ysunadi.

3. Bo‘lim o‘z faoliyatida O‘zbekiston Respublikasining “Ta’lim to‘g‘risida”gi Qonuni, O‘zbekiston Respublikasi Prezidentining farmonlari va qarorlari, O‘zbekiston Respublikasi Vazirlar Mahkamasining qarorlari, Oʻzbekiston Respublikasi Oliy ta’lim, fan va innovatsiyalar vazirligi, O‘zbekiston Respublikasi Sport vazirligi qarorlari hamda buyruqlari, universitet Ustavi, universitet Kengashi qarorlari, rektorning buyruqlari va boshqa me’yoriy hujjatlarga amal qiladi.

4. Bo‘limni O‘zbekiston Respublikasining amaldagi qonunchiligiga muvofiq Universitet rektori buyrug‘i bilan lavozimga tayinlanadigan va lavozimidan ozod qilinadigan Bo‘lim boshlig‘i boshqaradi.

Bo‘limning shtatlar jadvali bo‘lim boshlig‘ining taklifiga binoan universitet faoliyatining shartlari va xususiyatlaridan kelib chiqib universitet rektori tomonidan tasdiqlanadi.

5. Bo‘lim talabalarning akademik ta’tilni rasmiylashtiradi, akademik ma’lumotnoma va transkriptlar beradi, talabalar ma’lumotlar bazasidagi ma’lumotlarning to‘g‘riligini nazorat qiladi va Bo‘limning axborot tizimini yangilaydi, taqdim etilgan hujjatlarning to‘liqligini tekshiradi, talabalarga axborot yordamini ko‘rsatadi, talabalarni ro‘yxatga olish ma’lumotlar bazasini nazorat qiladi, universitet talabalarining shaxsiy va akademik ma’lumotlari haqida ma’lumot tayyorlaydi, talabalar kontingenti harakati hisobini yuritadi, talabalarga akademik ta’tilni rasmiylashtirish va talabalar safidan chetlashish hamda talabalar safiga tiklash uchun hujjatlarni taqdim etadi. Idoralararo yagona elektron hujjat aylanish tizimi “Ijro.gov.uz” da Talabalar bilan ishlash bo‘limiga tegishi hujjatlar bilan ishlash shaxsiy fayllarni yuritadi. O‘quv rejalaridagi fanlar farqi yoki akademik qarzni aniqlaydi, o‘quv rejalariga muvofiq individual o'quv grafiklarini shakllantiradi. Talabalarga universitetda o‘qish haqida to‘liq ma’lumot beradi, tizimga kirish uchun talabalarga login va parolni beradi, talabalarga axborot yordamini ko‘rsatadi, murojaatlarni qabul qiladi va ro‘yxatga oladi, murojaatlarni ko‘rib chiqadi va qayta ishlaydi, o‘quv jarayoni bo‘yicha qiyin va munozarali vaziyatlarda talabalarga maslahat beradi.

6. Bo‘lim xodimlari tegishli ma’lumotga, kasbiy tayyorgarlikka, malakaga va ish tajribasiga ega bo‘lgan mutaxassislardan iborat. Ularning vazifa va funksiyalar, huquq va majburiyatlari ushbu Nizom va lavozim yo‘riqnomalari bilan belgilanadi. Bo‘lim xodimlari o‘rtasida vazifalarni taqsimlash shtat jadvali va lavozim yo’riqnomalariga muvofiq Bo‘lim boshlig‘i tomonidan amalga oshiriladi.

Xodimlarning malakasini oshirish kurslarida, seminarlarda, treninglarda qatnashish, o‘z-o‘zini o‘qitish yo‘li bilan ularning malakasini oshirish ta’minlanadi. Bo‘limga tegishli bo‘lgan asosiy vazifa va funksiyalarni bajarish uchun zarur bo‘lgan huquqlar Bo‘lim xodimlarining lavozim yo‘riqnomalariga muvofiq amalga oshiriladi. Ushbu Nizom tasdiqlangan vaqtdan boshlab kuchga kiradi va majburiy hisoblanadi.

Boʻlim boshligʻi: Qirg‘izboyev Ma’rufjon Mo‘ydinovich

Email: m.qirgizboyev@jtsu.uz