Talabalarni ilmiy faoliyatga jalb qilayotgan ilmiy-amaliy anjumanlar davom etmoqda

Bugun O‘zbekiston davlat jismoniy tarbiya va sport universitetida Ko‘pkurash sport turlari fakulteti tomonidan “Ko‘pkurash sport turlarini rivojlantirishda ilg‘or texnologiyalarni tadbiq etish samaradorligi” mavzusida talabalar ilmiy-amaliy konferensiyasi tashkil etildi.

Unda fakultet dekani A.Tangriyev, kafedra-mudirlari, professor-o‘qituvchilar hamda talaba-yoshlar ishtirok etishdi.

Konferensiya davomida bir guruh talabalar tomonidan og‘ir atletika sport turi bo‘yicha musobaqalarni tashkil etish hamda uni o‘qitish va o‘rgatish uslublari, suzuvchilarning harakat vaqtidagi kuchini oshirishga tavsiya etilgan eksperimental mashqlarning samaradorligini tadqiq etish, shuningdek, boshqa sport turlarida ham sportchilarning har jihatdan harakatchan va jismoniy tayyorgarligini takomillashtirishga oid taqdimotlar qilindi. O‘z o‘rnida konferensiya kuzatuvchilari qilingan taqdimotlar yuzasidan ishtirokchi talabalarga savollar yo‘llash bilan birga, kerakli tavsiyalarni ham berib o‘tishdi.

konferensiya yakunida g‘olib deb topilgan hamda faol ishtirok etgan talaba-yoshlarga diplom va esdalik sovg‘alari topshirildi.