“Onam aytgan allalar” tanlovining fakultet bosqichlari o‘tkazilmoqda!

Joriy yilning 28-29 noyabr kunlari O‘zbekiston davlat jismoniy tarbiya va sport universitetida oliygohning Ko‘pkurash sport turlari hamda Sport o‘yinlari fakultetlarining talaba-qizlari o‘rtasida “Onam aytgan allalar” nomli ko‘rik-tanlovining saralash, ya’ni falkultet bosqichi o‘tkazildi.

Unda universitet Xotin-qizlar masalalari bo‘yicha rektor maslahatchisi F.Ganiyeva, fakultetlarning ma’naviy-ma’rifiy ishlar bo‘yicha dekan o‘rinbosari, tyutorlar hamda talaba qizlar ishtirok etishdi.

Tanlovda qatnashgan qizlarning barchasi o‘zgacha badiiy chiqishlar namoyish etib, ular nafaqat sportda faol, balki milliy urf-odatlarimiz va asriy an’analarimizni yoddan chiqarmagan holda, ularga doimo hurmat bilan munosabatda bo‘lishlarini, shuningdek, kuyida sehr mujassam bo‘lgan allani mahorat bilan kuylash orqali esa yaxshigina ijro mahoratiga ham ega ekanliklarini isbotladilar. Bunday iqtidorli qizlarni baholash hakamlar uchun ham qiyin kechdi.

Yakunda g‘olib deb topilgan talaba-qizlar tanlovning universitet bosqichiga yo‘l oldi.

Eslatib o‘tamiz, tanlovning universitet bosqichi joriy yil 3-dekabr kuni bo‘lib o‘tadi.