Maktab va universitet hamkorligi: taʼlimda yangicha tizim demakdir!

Bugun O‘zbekiston davlat jismoniy tarbiya va  sport universiteti va Chinoz tuman hokimligi hamkorligida O‘zbekiston Respublikasi Prezidentining 2022 yil 5-apreldagi xalq taʼlimi sohasida taʼlim sifatini oshirishga qaratilgan yig‘ilishida belgilab berilgan bir qator ustuvor vazifalar ijrosini taʼminlash, maktab va universitet hamkorligini samarali yo‘lga qo‘yish maqsadida “Umumtaʼlim maktablarida taʼlim sifatini oshirish: muammo va yechimlar” mavzusida seminar bo‘lib o‘tdi.

Seminarda Chinoz tumani hokimi B.Alimbekov, O‘zbekiston davlat jismoniy tarbiya va sport universiteti rektori M.Boltabayev, tuman xalq taʼlimi bo‘limi xodimlari, universitet kafedra mudirlari va tumandagi umumtaʼlim maktablari rahbarlari ishtirok etdi.

Tadbir davomida umumtaʼlim maskanlarida taʼlim sifatini oshirish, o‘qituvchilar salohiyati, o‘quvchilarning oliy o‘quv yurtlariga kirish ko‘rsatkichini ko‘tarish, yoshlarni ommaviy sportga jalb qilish orqali ham maʼnan ham jismonan barkamol qilib tarbiyalash, bu borada mahalla yoshlari o‘rtasida ilk marotaba “Besh tashabbus” olimpiadasi o‘tkazilayotgan kabi masalalarga alohida to‘xtaldi.

Shuningdek, tumanda joylashgan kurash sport zalida Olimpiada o‘yinlari sovrindori Abdulla Tangriyev va universitet professor-o‘qituvchilari tomonidan sportning dzyudo turi bo‘yicha mahorat darsi tashkil etildi.

Seminar yakunida Chinoz tumanidagi universitetga biriktirilgan 48 ta umumtaʼlim maktablaridagi mavjud holatlar, bildirilgan fikrlar yuzasidan muhokamalar o‘tkazildi. Shu bilan birga, kelgusida hamkorlikda olib boriladigan ishlar rejasi belgilab olindi.