Bayram tabrigi!

💐Bayram tabrigi!

Qadrli ustozlar, ishchi xodimlar va aziz talaba-yoshlar!

✅Avvalo sizlarni nafosat, yangilanish hamda o‘zbek xalqining qadimiy urf-odatlari va anʼanalarini o‘zida mujassam etgan Navro‘z umumxalq bayrami bilan chin dildan muborakbod etaman!

✅Navro‘z bayrami mamlakatimiz mustaqillikga erishganidan buyon har yili katta tantana va yuqori saviyada tashkil etiladigan, qadim-qadimdan xolis niyatli kishilarning sevimli ayyomi bo‘lib kelgan. Bu kunda hatto urush-janjallar to‘xtagan, gina-qudratlar kechirib yuborilgan, shohlar el ichidan eng munosib kishilarni taqdirlashgan. Umuman olganda, bu bayram yangi rejalar, yangi maqsadlar bayramidir. Shu sababdan ham Navro‘z so‘zi “Yangi kun” degan maʼnoni anglatadi. U doimo bir-birimizni mehr-oqibatli bo‘lishga va hamisha ezgulikka intilib yashashga chorlaydi.

✅O‘zbekiston Respublikasi Prezidentining “2022 yilgi Navro‘z umumxalq bayramiga tayyorgarlik ko‘rish va uni o‘tkazish to‘g‘risida”gi qarorida belgilanganidek, umumxalq bayrami mamlakatda “Assalom, Navro‘z – yangilanish, mehr-oqibat va qadr-qimmat ayyomi!” degan bosh g‘oya asosida umumxalq sayllari shaklida keng nishonlanmoqda. Shu bilan birga, Navro‘z tom maʼnoda millati, tili va dinidan qatʼiy nazar, har bir vatandoshimiz o‘zining huquq va manfaatlari, qadr-qimmatini tobora chuqur anglab borayotgan Yangi O‘zbekiston sharoitida umumxalq bayrami sifatida shodu xurramlik bilan nishonlanmoqda. Qolaversa, bayram munosabati bilan ketma-ket besh kun dam etib belgilanishi ham bejiz emas. Sababi bu kunlarda yoshi ulug‘, bemor kishilar holidan xabar olinadi, onalarimiz bayramning qadimiy taomlari bo‘lmish sumalak, ko‘k somsalarni tayyorlab barchaning diliga sevinch ulashadi hamda yurtimiz bo‘ylab sayohatlar uyushtiriladi. Bularning barchasi tanti, mehmondo‘st va bag‘rikeng o‘zbek xalqiga xos fazilatlardir.

✅Shu fursatdan foydalanib, yana bir bor barchangizni go‘zal ayyom bo‘lmish Navro‘zi olam bilan samimiy tabriklayman. Ezgu niyatlar bilan boshlangan har bir ishingiz xayrli bo‘lsin. Xonadonlaringizda doimo to‘kin-sochinlik bo‘lib, sizlarni yil davomida tinchlik, baxt va omad tark etmasin! 

Mahmudjon Boltabayev
O‘zbekiston davlat jismoniy tarbiya va sport universiteti rektori, professor