Universitet – mahalla yoshlar yetakchisiga ko‘makchi

Bugun O‘zbekiston davlat jismoniy tarbiya va sport universiteti madaniyat saroyida Chirchiq shahar hokimligi, Chirchiq davlat pedagogika instituti bilan hamkorlikda “Mahalla fuqarolar yig‘ini yoshlar yetakchilari faoliyatini namunali tashkil yetishning zamonaviy mexanizmlari” mavzusida seminar o‘tkazildi.

Mazkur seminar O‘zbekiston Respublikasi Prezidentining 2022 yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida”gi qarorida belgilangan topshiriqlar ijrosini taʼminlash maqsadida tashkil yetildi.

Seminarda Chirchiq shahar hokimi D.Hidoyatov, 4 ta sektor rahbarlari, Chirchiq shahar deputatlari, O‘zbekiston davlat jismoniy tarbiya va sport universiteti rektori M.Boltabayev, Chirchiq davlat pedagogika institutining yoshlar bilan ishlash bo‘yicha prorektori B.Xusanov hamda 44 ta mahalla fuqarolar yig‘inlarining yoshlar yetakchilari qatnashdi.

Uchrashuvda so‘zga chiqqan O‘zbekiston davlat jismoniy tarbiya va sport universiteti rektori, professor M.Boltabayev “Bugungi kunda yoshlar yetakchilariga “Bo‘ldi o‘zingni aravangni o‘zing tort” naqli ostida qarab ish ko‘radigan bo‘lsak, biz olimlar faqat kuzatuvchi bo‘lib o‘tirsak, jamiyatimizdagi muammolar hal bo‘lmaydi” - deya taʼkidlab o‘tdi. Shuningdek, mahallalarda yoshlarning bo‘sh vaqtini mazmunli tashkil yetish, ularning tashabbuslarini rag‘batlantirish, milliy xalq o‘yinlari va sport turlarini yoshlar orasida ommalashtirish hamda besh muhim tashabbus loyihalari, yoshlar festivallari va boshqa maʼdaniy-maʼrifiy tadbirlarni amalga oshirishda ikkala oliy taʼlim muassasasi rahbarlari yordamchi va hamkor sifatida tajribali kafedra mudirlarini biriktirishlari haqida alohida taʼkidlab o‘tdi. Shuningdek, yoshlar yetakchilarini doimo birgalikda ishlashga chaqirdi.

Seminar yakunida “Yashil makon” umummilliy loyihasi doirasida Chirchiq shahri va universitet hududidagi mavjud mahallalarga 4000 dan ziyod manzarali ko‘chatlar ekish rejalashtirilganligi aytib o‘tilib, dastlabki 20 tup manzarali ko‘chatlar Chirchiq shahri hokimi va O‘zDJTSU rektori tomonidan universitet madaniyat saroyi hovlisiga o‘tqazildi.

O‘zDJTSU axborot xizmati