“Universitet futbol ligasi – 2021” g‘oliblari aniq bo‘ldi

O‘zbekiston Respublikasi Prezidentining 2019-yil 4-dekabrdagi “O‘zbekistonda futbolini rivojlantirishni mutlaqo yangi bosqichga olib chiqish chora-tadbirlari to‘g‘risida”gi PF-5887-sonli, 2020-yil 30-oktyabrdagi “Sog‘lom turmush tarzini keng targ‘ib etish va ommaviy sportni yana-da rivojlantirish chora-tadbirlari to‘g‘risida”gi PF-6099-sonli farmonlari ijrosini taʼminlash, professor-o‘qituvchilar, ishchi xodimlarni ommaviy sport bilan shug‘ullanishiga imkoniyatlar yaratish maqsadida O‘zbekiston davlat jismoniy tarbiya va sport universitetida ikkinchi marotaba “Universitet futbol ligasi – 2021” tashkil etildi.

Musobaqada avvalgi yilning g‘olibi hisoblangan Qishki sport turlari kafedrasi va ikkinchi o‘rin sohiblari Futbol nazariyasi va uslubiyati kafedralari ishtirok etishmadi, aksincha bu jamoa futbolchilari qolgan jamoalarga transfer qilindilar bu esa musobaqani yana-da jozibali o‘tishiga katta xissa qo‘shdi.

Musobaqada 11 jamoa ishtirok etdi. Bular: Maʼnaviyat, Sport o‘yinlari, Atlet, Ziyokor, Star, Kurash, Psixologiya, Intellect, Ko‘pkurash-Miks, Atlantiks va Xalqaro kurash jamoalaridir. 3 oy davom etgan musobaqada umumiy hisobda jamoalar 114 uchrashuvda maydonda yuzma yuz kelishdi. Musobaqa o‘tkazilishi jarayoni esa “Universitet futbol ligase” telegram tarmog‘i orqali keng miqyosda yoritilib borildi.

Bugun mazkur musobaqaga “Maʼnaviyat” va “Sport o‘yinlari” jamoalari o‘rtasidagi uchrashuv bilan rasman yakun yasaldi hamda musobaqada o‘z iqtidori va mahorati bilan ko‘pchilikni qalbidan o‘rin egallagan jamoalar va futbolchilarni taqdirlash marosimi bo‘lib o‘tdi.

Qiziqarli va murosasiz kechgan bahsda asosiy vaqtda jamoalar durang o‘ynashdi. Penaltilar seryasida esa omad “Sport o‘yinlari” jamoasiga kulib boqdi. Ikkinchi o‘rinni “Maʼnaviyat”, uchinchi o‘rinni “Atlet” jamoalari egalashdi.

Taqdirlash marosimi universitet kasaba uyushmasi, Qishki va murakkab-texnik sport turlari fakulteti hamda Futbol fakulteti hamkorligida o‘tkazildi.

Tadbirda “Universitet futbol liga”si tashkilotchilari hamda eng yaxshi futbolchilarga esdalik sovg‘alar, diplom va medallar topshirildi.

Xususan, musobaqani tashkil etish va uni o‘tkazishdagi faol ishtiroki uchun universitet rektori, professor Maxmudjon Boltabayev, 11-turning eng yaxshi futbolchisi “Kurash” jamoasi o‘yinchisi Zoxidjon Artikov,Maʼnaviyat va maʼrifat bo‘limi boshlig‘i Jamoliddin Mamanov, Futbol fakulteti dekani Damir Ismagilov, Qishki va murakkab-texnik sport turlari fakulteti dekani, musobaqaning bosh xakami Sultanbek Davletmuratov, Qishki sport turlari kafedrasi mudiri Abduxamid Karimov, universtitet kasaba uyushmasi raisi Muxsinjon Olimov, O‘quv-uslubiy boshqarma boshlig‘i Eldor Raxmanov, Futbol nazariyasi va uslubiyati kafedrasi o‘qituvchilari Sirojiddin Pulatov hamda Izzatbek Qutlimuratov taqdirlandi.

Shuningdek, “Universitet futbol ligasi-2021” nominatsiya mukofotlari quyidagi professor-o‘qituvchilarga topshirildi:

Uyg‘un Jumayev – “No mutaxassis sportchi tomonidan kiritilgan Musobaqaning eng chiroyli goli muallifi”;

Farxod Maxamadjanov – “Musobaqaning eng chiroyli goli muallifi”;

Sirojiddin Pulatov – “Musobaqaning eng yaxshi to‘purari”;

Shuxratjon Tulyaganov – “Musobaqaning eng yaxshi darvozaboni”;

Iqrorjon Soliyev – “Musobaqaning eng yaxshi ximoyachisi”;

Mirzaraxim Ro‘ztboyev – “Musobaqaning eng yaxshi xujumchisi” ;

Shoxrux Xojiyev – “Musobaqaning eng yaxshi o‘yinchisi” .