Professor Raxmatilla Salamovning 80 yilligiga bag‘ishlab Xalqaro ilmiy-amaliy anjuman o‘tkazildi

Bugun O‘zbekiston davlat jismoniy tarbiya va sport universitetida Jismoniy tarbiya, sport nazariyasi va uslubiyati kafedrasi professori, pedagogika fanlari doktori Salamov Raxmatilla Salomovichning 80 yilligiga bag‘ishlangan «Jismoniy tarbiya, sport mashg‘ulotlari nazariyasi va uslubiyatining nazariy-amaliy muammolari» mavzusida Xalqaro ilmiy-amaliy anjuman o‘tkazildi.

Xalqaro ilmiy-amaliy konferensiyada Rossiya, Ukraina davlatlaridan va yurtimizdagi yetakchi olimlar ishtirok etdilar.

Anjumanda yurtimizda sport taʼlimi, jismoniy tarbiya nazariyasi va uslubiyati fanining asoschisi, pedagog olim,  R.Salamovning hayot yo‘li, ilmiy merosi, jismoniy tarbiya va sport bo‘yicha yaratgan ilmiy maktabi, sohada erishilgan yutuqlar, zamonaviy jismoniy tarbiya va sportning dolzarb masalalari muhokama etildi.

Shu o‘rinda professor Raxmatilla Salamov haqida qisqacha maʼlumot bu inson yurtimizda sport taʼlimi, jismoniy tarbiya nazariyasi va uslubiyati fanining asoschisi, fanning rivojlanishiga katta hissa qo‘shgan olim va mehribon  ustozlardan biri. U qariyb 52 yillik mehnat faoliyatini jismoniy tarbiya va sportga bag‘ishlagan yetuk olimlardandir. R.Salomov 1942 yil 30-yanvarda Samarqand viloyati Nurota tumanida tug‘ilgan.

1968 yilda O‘zbekiston davlat jismoniy tarbiya institutini imtiyozli diplom bilan tugatib, mazkur dargohda avval o‘qituvchi, katta o‘qituvchi, kafedra mudiri, dekan muovini lavozimlarida samarali mehnat faoliyatini olib borgan. Shuningdek, Ulug‘ ustoz faoliyati davomida O‘zbekiston Respublikasi Xalq taʼlimi vazirligining Jismoniy tarbiya va sport boshqarma boshlig‘i lavozimida fidokorona mehnat qilgan.

1971-1974 yillari Moskvada aspiranturada o‘qib, «4-sinf o‘quvchilarida tezkorlikni tarbiyalashda o‘yin metodidan foydalanish» mavzusida nomzodlik dissertatsiyasini, 2003 yilda «Jismoniy tarbiya va sport bo‘yicha mutaxassislarni tayyorlashda o‘quv-tarbiya jarayonini optimallashtirish» mavzusida doktorlik dissertatsiyasini himoya qilgan.muvaffaqiyatli himoya qildi.

Ayni paytda O‘zbekiston davlat jismoniy tarbiya va sport universitetida professor lavozimida faoliyat olib bormoqda.

Konferensiya professor Raxmatilla Salomovning ilmiy- pedagogik faoliyati: mohir pedagog, jonkuyar ustoz, samimiy inson, Jismoniy tarbiya va sport mashg‘ulotlarining nazariy-amaliy muammolari, Jismoniy tarbiya va ommaviy sportni rivojlantirish, Zamonaviy taʼlim-tarbiya tizimida jismoniy tarbiya va sport, Yuqori malakali sportchilar tayyorlash tizimida innovatsion yondashuvlar va Olimpiya va Paralimpiya sport turlarini rivojlantirishda muammolar, istiqbollar va yechimlar kabi shuʼbalarda davom ettirilib, ularda 100 dan ortiq dolzarb maʼruzalar qilindi.