1 oktyabr – O‘qituvchi va murabbiylar kuni munosabati bilan bayram tabrigi

Assalomu alaykum, muhtaram ustozlar!

Siz, azizlarni, sizlarning timsolingizda ustoz degan sharafli nomni ulug‘lab kelayotgan barcha insonlarni O‘qituvchi va murabbiylar kuni bilan samimiy tabriklayman.

Buyuk bobomiz Alisher Navoiy aytganlaridek, dunyoning bor boylik va xazinasi bilan ham oliyjanob mehnatingiz haqini ado etib bo‘lmaydi. Haqiqatan ham, o‘quvchilarini o‘z farzandidek ardoqlab, yosh avlod tarbiyasi uchun ko‘z nuri, qalb qo‘ri, butun borlig‘ini baxsh etadigan o‘qituvchi va murabbiylar tom maʼnoda fidoyi kasb egalaridir.

Muhtaram o‘qituvchilar!

Biz bugun zamonaviy bilim va kasb-hunar, xorijiy tillarni puxta egallab, katta umid va ishonch bilan hayotga qadam qo‘yayotgan, ertangi kunimizning hal qiluvchi kuchi bo‘lgan ming-minglab farzandlarimiz kamolida o‘qituvchi va murabbiylarimizning beqiyos hissasi borligini yaxshi bilamiz va sizlarning bu ulug‘ xizmatingizni yuksak qadrlaymiz. Zero, millatning, xalqning ertasi, taraqqiyoti aziz ustozlar qo‘lida! Shu boisdan, taʼlim sohasida ko‘p yillar samarali mehnat qilib, hozirgi kunda o‘z maslahatlari bilan taʼlim sifatini oshirishda yaqindan yordam berib kelayotgan barcha faxriy ustozlarimizga suyanamiz va taʼzim qilamiz.

Aziz do‘stlar, qadrli murabbiylar!

Joriy yilda O‘zbekiston Respublikasi Prezidenti va Vazirlar Mahkamasining bevosita taʼlim-tarbiya sohasiga daxldor ko‘plab farmoni, qaror va farmoyishlari qabul qilindi. Shu asnoda, o‘qituvchining jamiyatda obro‘sini oshirish, moddiy rag‘batlantirish va ijtimoiy muhofaza qilishni yaxshilash, ularning samarali ishlashi uchun zarur sharoitlar yaratish bo‘yicha sezilarli ishlar amalga oshirilmoqda. Soha rivojiga yuksak eʼtibor natijasi bo‘lgan bu hujjatlarni hayotga samarali joriy qilishda avvalo siz, aziz o‘qituvchi va murabbiylarga, sizlarning bilimingiz, tajribangiz, isteʼdod hamda mahoratingizga tayanamiz!

Muhtaram o‘qituvchi-murabbiylar, aziz ustozlar!

Agarda dunyoda imoratlar ichida eng ulug‘i maktab bo‘lsa, kasblar ichida eng sharaflisi o‘qituvchilik va murabbiylikdir!

Sizlarni 1 oktyabr – o‘qituvchi va murabbiylar kuni bilan yana bir bor tabriklab, barchangizga uzoq umr, baxt-saodat, xonadoningizga fayzu-baraka, barkamol avlodni voyaga yetkazishdagi ezgu ishlaringizga ulkan zafarlar tilayman!

O‘zbekiston davlat jismoniy tarbiya va sport universiteti rektori, professor M.Boltabayev