Para sport turlarini targ‘ib qilish va rivojlantirish yo‘lidagi hamkorlik

Bugun O‘zbekiston Milliy Paralimpiya qo‘mitasi hamda O‘zbekiston davlat jismoniy tarbiya va sport universiteti o‘rtasida o‘zaro hamkorlik Shartnomasi imzolandi.

Yuqori darajada tashkil etilgan tadbir davomida yurtimizda jismoniy imkoniyati cheklangan va nogironligi bo‘lgan shaxslarga sport bilan shug‘ullanish uchun zarur shart-sharoitlar yaratish, ularning xalqaro sport maydonlarida munosib ishtirok etishini ta’minlash va davlat tomonidan qo‘llab-quvvatlash maqsadida, shuningdek, O‘zbekiston Respublikasi Prezidentining 2021-yil 18-maydagi “Paralimpiya harakatini rivojlantirishga doir qo‘shimcha chora-tadbirlar to‘g‘risida”gi hamda 2020-yil 6-noyabrdagi “O‘zbekistonning yangi taraqqiyot davrida ta’lim-tarbiya va ilm-fan sohalarini rivojlantirish chora-tadbirlari to‘g‘risida”gi Qarorlari ijrosini ta’minlash, shu bilan birga, O‘zbekiston davlat jismoniy tarbiya va sport universiteti “Paralimpiya” fakultetining ham istiqbolli ham iqtidorli talabalarini tanlash va tayyorlashning samarali tizimini yaratish kabi muhim masalalar to‘g‘risida ikki tomon vakillari o‘z fikrlarini bildirib o‘tishdi.

Tadbir yakunida tomonlar kelgusida o‘zaro hamkorlik asosida amalga oshiriladigan bir qator ishlar yuzasidan kelishib oldilar.