Chirchiq shaxridagi 24 ta maktab universitetdagi fakultetlar va kafedralarga biriktirildi

Joriy yilning 8-aprel kuni O‘zbekiston davlat jismoniy tarbiya va sport universitetida Toshkent viloyatining Chirchiq shaxrida joylashgan 24 ta umumtaʼlim maktablari rahbarlari uchun o‘quv-seminar tashkil etildi.  

Universitet va Chirchiq shahar xalq taʼlimi bo‘limi hamkorligida o‘tkazilgan mazkur seminarda O‘zbekiston Respublikasi Prezidenti Shavkat Mirziyoyev raisligida 5 aprel kuni xalq taʼlimi sohasida amalga oshirilayotgan islohotlar natijadorligining tahlili yuzasidan o‘tkazilgan videoselektor yig‘ilishida belgilab berilgan vazifalar ijrosiga ahamiyat qaratildi.

O‘quv-seminarda umumtaʼlim muassasalari bilan o‘zaro hamkorlik hamda maktablarda taʼlim sifatini oshirish masalalari muhokama qilindi. Seminar davomida Chirchiq shaxridagi 24  ta maktab universitetdagi kafedra va fakultetlarga biriktirib berildi. Barcha maktablar bilan kelgusida amalga oshiriladigan ishlar bo‘yicha yo‘l xaritalari ishlab chiqishga kelishib olindi.