Kurash – halol yo‘l bilan maqsadga erishish demakdir!

Bugun O‘zbekiston davlat jismoniy tarbiya va sport universitetida “Kurash sport turini rivojlantirish istiqbollari” mavzusida xalqaro ilmiy onlayn anjuman bo‘lib o‘tdi.

Unda zamonaviy kurash asoschisi, O‘zbekiston kurash federatsiyasi raisining birinchi o‘rinbosari K.Yusupov, Janubiy Koreyalik Xalqaro Kurash instituti eksperti Kim Eur Jon, O‘zbekiston Milliy Olimpiya qo‘mitasi Kurash milliy sport turini rivojlantirish bo‘limi boshlig‘i K.Usmonov, O‘zDJTSU rektori M.Boltabayev hamda onlayn tarzda ushbu sohadagi Rossiya, Germaniya, Ukraina va Izroillik mutaxassislar shuningdek, universitet professor o‘qituvchilari va talabalari ishtirok etishdi.

Anjuman davomida ishtirokchi mutaxassislar tomonidan bir qancha taqdimotlar qilindi. Ularda asosan kurash sport turning jahon va O‘zbekistondagi rivojlanish istiqbollari, tarixi, buguni va mazkur sport turi bo‘yicha malakali mutaxassis, trener hamda xalqaro toifadagi hakamlar tayyorlashning tashkiliy asoslari kabi masalalarga alohida to‘xtalib o‘tildi. Shu bilan birga, qilingan taqdimotlarda kurashchilarning psixofizik tayyorgarligi, o‘quv-mashq jarayonini monitoring qilish, kurash bo‘yicha musobaqalarni o‘tkazishning xalqaro qoida va yangiliklari to‘g‘risida ham fikrlar bildirildi.

Anjuman yakunida taqdimotlar yuzasidan savollar yo‘llandi va ular bo‘yicha muhokamalar o‘tkazildi.