Bugun O‘zbekiston davlat jismoniy tarbiya va sport universitetiga press-tur tashkil etildi. Shuningdek, press-tur doirasida O‘zbekiston Respublikasi Prezidentining “Sog‘lom turmush tarzini keng tatbiq etish va ommaviy sportni yana-da rivojlantirish chora-tadbirlari to‘g‘risida”gi Farmoni ijrosini taʼminlash maqsadida jurnalistlar va blogerlar o‘rtasida stol tennisi bo‘yicha “Rektor kubogi” musobaqasi ham o‘tkazildi.
Dastavval tashrif buyurgan jurnalist va blogerlar universitet madaniyat saroyida joylashgan universitet muzeyi, ARM, o‘quv xonalari, sport zallarida professor-o‘qituvchilar va talabalar uchun yaratilgan shart-sharoitlar hamda universitet faoliyati bilan yaqindan tanishdi. Press-tur davomida boks, kurash, gimnastika, dzyudo, taekvondo, karate sport turlari bo‘yicha pedagogik mahorat darslarida Olimpiada o‘yinlari, Osiyo va jahon chempionatlarining sovrindorlari ishtirokida ko‘rgazmali chiqish va master-klasslar ham o‘tkazildi.
Shuningdek, tadbir doirasida jurnalistlar, blogerlar hamda universitet rahbariyati bilan uchrashuv bo‘lib o‘tdi. Unda jurnalist va blogerlar o‘zlarini qiziqtirgan savollar bilan murojaat qildi hamda ularga atroflicha javob olishdi.
Yig‘ilish davomida universitet va "Sport" telekanali bilan o‘zaro hamkorlik Memorandumi ham imzolandi. Uchrashuv yakunida universitet rahbariyati tomon yo‘llangan eng yaxshi savol egalariga rektorning maxsus sovg‘alari topshirildi.
Shundan so‘ng, stol tennisi bo‘yicha “Rektor kubogi” musobaqasiga start berildi. Musobaqada 40 nafarga yaqin jurnalist va blogerlar ishtirok etdi. Musobaqa avvalida universitet rektori M.Boltaboyev va “Sport” telekanali direktori Z.Karimovlar o‘rtasida ko‘rgazmali o‘yin tashkil etildi.
Qizg‘in va murosasiz davom etgan bahslardan so‘ng g‘oliblar aniqlandi. Unga ko‘ra erkaklar o‘rtasida 1-o‘rinni "Sport" telekanali jurnalisti Sanjar Muhammadxonov, 2-o‘rinni ham ushbu telekanal jurnalisti Sardor Rahimov, 3-o‘rinni esa Respublika telemarkazi xodimi Abbosjon Murodjonovlar egallashdi.
Ayollar o‘rtasida 1-o‘rin "Sport" telekanali jurnalisti Malika Ermatovaga, 2-o‘rin Sirdaryo viloyati Sportni rivojlantirish bosh boshqarmasi matbuot kotibi Sayyora Irisqulovaga, 3-o‘rin esa “Dunyo bo‘ylab” telekanali jurnalisti Ozoda To‘raqulovaga nasib etdi. Musobaqa yakunida g‘olib va sovrindorlarga estalik sovg‘alari topshirildi.
15 aprel , 2024
15 aprel , 2024
15 aprel , 2024
15 aprel , 2024
15 aprel , 2024
15 aprel , 2024
©
Saytdagi materiallardan to`liq yoki qisman foydalanilganda, ushbu resursga havola etilishi shart
© 2024 O`zbekiston davlat jismoniy tarbiya va sport universiteti
PROACTIVE MEDIA tomonidan ishlab chiqildi
O`zbek tili
Русский
English
