Bugun O‘zbekiston davlat jismoniy tarbiya va sport universitetida “Jismoniy tarbiya va sport sohasida ilmiy salohiyatni yana-da oshirish muammolari va istiqbollari” mavzusida jismoniy tarbiya va sport sohasidagi olimlarning Respublika anjumani bo‘lib o‘tdi.

Anjumanda universitet rektori, professor M.Boltabayev, Ilmiy ishlar va innovatsiyalar bo‘yicha prorektor K.Bayazitov, “Sport” teleradiokanali direktori Z.Karimov, universitet huzuridagi Jismoniy tarbiya va sport ilmiy tadqiqotlar instituti direktori o‘rinbosari N.To‘xtaboyev hamda sohadagi olimlar va ilmiy izlanuvchilar ishtirok etishdi.

Olimlar har bir sohada malakali mutaxassislar tayyorlash dolzarb ekanligi, shu bilan birga, ilm-fandagi o‘zgarishlar, yangi innovatsion texnikalarning yaratilishi ushbu sohada zamonaviy bilim va ko‘nikmalarga ega kadrlarga ehtiyoj yuzaga keltirayotganini alohida taʼkidlab o‘tishdi.

Shuningdek, 2019-2021-yillar davomida jismoniy tarbiya va sport sohasida ilmiy izlanish olib borgan 60 nafarga yaqin yosh olimlarning himoya ishlaridagi mavzular dolzarbligi, erishilgan yutuqlar hamda hali yoritilmagan mavzular va yangi sport turlarida ham ilmiy izlanishlar olib borish to‘g‘risida fikr-mulohazalar bildirildi.

So‘ngra yaqinda o‘zlarining nomzodlik dissertatsiyasini himoya qilgan G.Zoitova, G.Xolbayeva va F.Yakubovlarga tantanali ravishda pedagogika fanlari bo‘yicha falsafa doktori diplomlari topshirildi.

Tadbir davomida anjumanda qatnashgan olimlar universitetdagi mavjud mutaxassislik kafedralari faoliyati bilan ham yaqindan tanishdi.