8 mart – Xalqaro xotin-qizlar kuni munosabati bilan O‘zbekiston davlat jismoniy tarbiya va sport universiteti rektori, professor Mahmudjon Boltabayevning bayram tabrigi

#8_mart_Xalqaro_xotin_qizlar_kuni

Assalomu alaykum, muhtarama opa-singillar va qadrli sportchi-talaba qizlarim!

O‘lkamizga biz sog‘inib, orziqib kutgan fasllar ichida eng go‘zali, betakror, bayramona quvonchli kunlarga, lahzalarga boy Bahor tashrif buyurdi.

Avvalo yurtimizga tashrif buyurgan yasharish, yangilanish fasli bo‘lgan bahor bayrami bilan barchangizni tabriklayman.

Davlatimiz rahbari tomonidan joriy yilning 1 mart kuni o‘tkazilgan videoselektorda xotin-qizlarni qo‘llab-quvvatlash tizimini yangi bosqichga ko‘tarish va ayollarning jamiyatdagi o‘rnini yana-da yuksaltirish va mustahkamlash, shuningdek, ularning ijtimoiy himoyasini kuchaytirish, oilaviy zo‘ravonlikning oldini olish, gender tenglikni qaror toptirishga qaratilgan muhim chora-tadbirlar belgilandi.

Bundan, tashqari kuni kecha prezidentimiz 8 mart – Xalqaro xotin-qizlar kuniga bag‘ishlangan tantanali marosimda ham xotin-qizlarlarimiz uchun bir qator imtiyozlar joriy etilishi xususida taʼkidlab o‘tdilar.

Xususan, qizlarimizning zamonaviy bilimlar va kasb-hunar egasi Bo‘lib, jamiyatda hamda o‘z oilasida munosib o‘rin topishi uchun 2022-2026 yillarga mo‘ljallangan Xotin-qizlar taʼlimini qo‘llab-quvvatlash milliy dasturi qabul qilinadi. Ushbu hujjat doirasida poytaxtda xotin-qizlar uchun alohida universitet va joylarda uning texnikumlari tashkil etiladi. Barcha talaba qizlarga taʼlim kontraktlarini to‘lash uchun 7 yil muddatga foizsiz kredit berish tartibi joriy qilinadi. Shuningdek, kelgusi o‘quv yilidan boshlab magistraturada o‘qiyotgan barcha qizlarning kontrakt pullari to‘liq byudjetdan qoplab beriladi. Doktorantura yo‘nalishida xotin-qizlar uchun har yili kamida 300 tadan maqsadli kvota ajratiladi.

Shuning o‘zi, jamiyatimizda sizlarga berilayotgan yuksak eʼtibor namunasi ekanligini ko‘rishimiz mumkin.

Bu kabi imtiyoz, g‘amxo‘rliklar Yangi O‘zbekistonning ayollari uchun yangicha yondashuv va dunyoqarash bilan yangi imkoniyatlar eshigini ochishi shubhasiz.

Shu fursatdan foydalanib, Mamlakatimiz sporti rivoji yo‘lida mehnat qilayotgan barcha opa-singillarimizni, universitet ayollar jamoasini, talaba qizlarimizni “8 mart Xalqaro xotin-qizlar kuni” bayrami bilan O‘zbekiston davlat jismoniy tarbiya va sport universiteti va shaxsan o‘zim nomimdan samimiy qutlayman.

Yurtimiz dovrug‘ini ko‘klarga ko‘tarishdan, vatanimiz uchun yangidan-yangi chempionlarni tarbiyalab berishdan aslo charchamang! Xonadoningizga tinchlik-xotirjamlik, dasturxoningizga qut-baraka tilayman.

Yana bir bor bayramingiz bilan, aziz opa-singillar!