Taʼlim barcha sohaning rivojiga asos bo‘luvchi eng muhim omil

Taʼlimga eʼtibor bugun har qachongidan ham ortgan. Negaki, barcha taʼlim maskanlarida sifatli hamda zamonaviy innovatsiyalar asosida bilim berishni ayni vaqtdagi, tezkor va shiddat bilan odimlayotgan, ilg‘or texnologiyalar asosida rivojlanayotgan zamonning o‘zi taqoza qilmoqda. O‘zbekiston Respublikasi prezidenti Sh. Mirziyoyev rahbarligida 2022 yil 28 yanvarda o‘tkazgan yig‘ilishda berilgan topshiriqlar yuzasidan Oliy va o‘rta maxsus taʼlim vazirligi va Taʼlim inspeksiyasi tomonidan taʼlim muassasalarning sifati, holati va ularda yaratilgan sharoitlar o‘rganilmoqda.

Navbatdagi o‘rganishlar joriy yilning 15-18 va 22 fevral kunlari Toshkent viloyatidagi muassasalarda tashkil etildi.

Joriy yilning 22-fevral kuni Taʼlim sifatini nazorat qilish Davlat inspeksiyasi boshlig‘i U.Tashkenbayev, Oliy va o‘rta maxsus taʼlim vazirining fan va innovatsiyalar bo‘yicha o‘rinbosari R. Xakimov boshchiligidagi ishchi guruh O‘zbekiston davlat jismoniy tarbiya va sport universitetida bo‘ldi.

Ishchi guruh dastavval, universitetning madaniyat saroyi, talabalar turar joylari, axborot resurs markazi hamda sport zallarida sportchi talabalarga yaratilgan imkoniyatlar, ularning bo‘sh vaqtlarini mazmunli tashkil etish borasida amalga oshirilayotgan ishlar bilan tanishdi.

Shundan so‘ng, o‘rganish davomida viloyatdagi taʼlim tashkilotlarida taʼlim oluvchilarga sifatli taʼlim olish uchun yaratilgan sharoitlar va taʼlim sifatini yaxshilash bo‘yicha olib borilayotgan ishlar samaradorligi tahlil qilindi.

Yig‘ilishda Taʼlim sifatini nazorat qilish davlat inspeksiyasi rahbari U. Toshkenboyev, Oliy va o‘rta maxsus taʼlim vazirining fan va innovatsiyalar bo‘yicha o‘rinbosari R. Hakimov, Toshkent viloyati hokimining Yoshlar siyosati, ijtimoiy rivojlanish va maʼnaviy-maʼrifiy ishlar bo‘yicha o‘rinbosari Z. Mirgaziyeva, oliy taʼlim muassasasi rektorlari, maktabgacha, xalq taʼlimi hududiy bo‘linmalari rahbarlari ishtirok etishdi.

Bo‘lib o‘tgan yig‘ilishda Toshkent viloyatidagi mavjud taʼlim muassasalarida olib borilgan o‘rganishlar natijasi tahlil qilindi. Unga ko‘ra viloyatning taʼlim maskanlarida pedagogik kadrlarning yetishmasligi, bo‘sh ish o‘rinlarining to‘ldirilmagani, ayniqsa ayrim maktablarda oliy toifadagi o‘qituvchilar deyarli yo‘qligi, baʼzi tabiiy va aniq fanlardan dars beruvchi pedagoglar yetarlicha bilim salohiyatga ega emasligi, kutubxonalar faoliyati to‘g‘ri yo‘lga qo‘yilmagani, bu borada ko‘z bo‘yamachilikka yo‘l qo‘yilgani qattiq tanqid ostiga olindi. Shu boraborda oliy taʼlim tizimidagi ayrim kamchiliklarga ham to‘xtalib o‘tildi. Jumladan, universitetlardagi pedagoglar zamonaviy metodikalardan foydalanish darajasi pastligi, HEMIS axborot tizimidan foydalanish qoniqarli emasligi, talabalar bilimini amaliy jihatdan emas hamon test orqali baholash bilan cheklanayotgani, shuningdek, tyuterlar faoliyatidan umuman qoniqish hosil qilinmaganligi, sirtqi va magistratura taʼlimi bo‘yicha tizimli platforma yo‘qligi hamda barcha amaliyotlar monitoring qilib borilmaganligi alohida taʼkidlab o‘tildi. Kamchiliklar bilan birga oliy taʼlim muasasalarining yutuqli tomonlari ham eʼtirof etildi. Misol uchun, O‘zbekiston davlat jismoniy tarbiya va sport universitetida zamonaviy qurilish ishlari, tibbiyot fakultetidagi tibbiy uskuna va darsliklar hatto respublikadagi tibbiyot insitutlarida ham mavjud emasligi, talabalar uchun tashkil etilgan mazmunli to‘garaklar faoliyat yuritayotgani mamnuniyat bilan tilga olindi.

Yig‘ilish so‘ngida yuqorida keltirilgan barcha kamchilik, xatolik va muammolar yuzasidan rahbarlarga tegishli vazifa hamda taʼlim sifatini yana-da oshirish bo‘yicha “yo‘l xaritalari”ni ishlab chiqish kabi bir qator topshiriqlar berildi.

O‘zDJTSU axborot xizmati