Bo‘stonliqda “Chimgan Challenge” festivali bo‘lib o‘tdi

Bugungi kunda O‘zbekiston Respublikasi turizm va sport vazirligi Ommaviy sportni rivojlantirish boshqarmasi va O‘zDJTSU “Sport tadbirlarini tashkil etish” kafedrasi o‘zaro hamkorlikda mazkur sohada bir qator ishlarni amalga oshirib kelmoqda. Jumladan, davlatimiz rahbarining 2020-yil 30-oktabrdagi “Sog‘lom turmush tarzini keng tatbiq etish va ommaviy sportni yanada rivojlantirish chora-tadbirlari to‘g‘risida”gi Farmoni ijrosini taʼminlash maqsadida 16-fevral kuni Bo‘stonliq tumanida Turizm va sport vazirligi tomonidan “Chimgan Challenge” xalqaro sport festivali doirasida O‘zbekiston Respublikasining barcha davlat organlari vakillari - sog‘lom turmush tarzini targ‘ib qilish bo‘yicha masʼul ishtirokchilar uchun o‘quv seminari bo‘lib o‘tdi.

Unda Turizm va sport vazirligining Ommaviy sportni rivojlantirish boshqarmasi boshlig‘i Zarrina Abdullayeva, O‘zbekiston davlat jismoniy tarbiya va sport universiteti “Sport tadbirlarini tashkil etish” kafedrasi mudiri Nodira Xudayberdiyeva, boshlovchi va jurnalist Parviz Fattoyev hamda sport mutaxasislari qatnashdi.

Seminar doirasida ommaviy sportni rivojlantirish borasidagi vazifalar, ommaviy axborot vositalari bilan samarali hamkorlik qilish, davlat xizmatchilari o‘rtasida sog‘lom turmush tarzini yanada rivojlantirish bo‘yicha o‘z takliflari, o‘zaro tajriba almashish hamda amalga oshirilgan ishlar bilan o‘rtoqlashish imkonini beruvchi platforma yaratish borasida fikrlar bildirib o‘tildi. Shuningdek, seminar davomida qiziqarli o‘quv mashg‘ulotlari hamda badminton, shaxmat, mini-futbol, snoubord, chang‘i sporti, arqon tortish, kamondan o‘q otish kabi milliy sport turlari bo‘yicha ishtirokchilar o‘rtasida musobaqalar tashkil etildi.