Velosportni rivojlantirish bo‘yicha videoselektor o‘tkazildi

2021 yil 24 dekabr kuni O‘zbekiston Respublikasi Oliy Majlisi  Senati Raisi T.Narbayeva raisligida Velosportni rivojlantirish bo‘yicha respublika Kengashining birinchi videoselektor yig‘ilishi bo‘lib o‘tdi.

Vazirliklar va idoralar vakillari, Qoraqalpog‘iston Respublikasi Vazirlar Kengashi, viloyatlar va Toshkent shahar hokimlarining moliya, iqtisodiyot va kambag‘allikni qisqartirish masalalari bo‘yicha birinchi o‘rinbosarlari – mahalliy velosiped sporti federatsiyasi raislari, Turizm, sport, madaniyat, madaniy meros va ommaviy kommunikatsiyalar masalalari bo‘yicha hokim o‘rinbosarlari va tegishli mutasaddi rahbarlar, shuningdek O‘zbekiston davlat jismoniy tarbiya va sport universiteti rahbariyati hamda velosport ixtisosligi bo‘yicha tegishli dekanat va kafedra masʼullari ishtirok etdi.

Videoselektor kun tartibida O‘zbekiston Respublikasi Prezidentining 2021 yil 24-sentyabrdagi “Velosport turlarini rivojlantirishga doir kompleks chora-tadbirlar to‘g‘risida”gi PQ–5251-son qarori ijrosi muhokama qilindi.

Yig‘ilish so‘ngida tegishli qarorlar qabul qilindi.

Maʼlumot uchun: O‘zbekiston davlat jismoniy tarbiya va sport universitetida velosport ixtisosligi bo‘yicha jami 242 nafar talaba (shundan 101 nafari kunduzgi, 141 nafari sirtqi taʼlim shaklida) tahsil olmoqda.

Ayni paytda respublikamizdagi barcha sport taʼlim muassasalari, xususan, Qaraqalpog‘iston Respublikasi, Toshkent shahri hamda Farg‘ona, Namangan, Toshkent, Sirdaryo, Jizzax, Samarqand, Buxoro, Xorazm viloyatlaridagi ixtisoslashtirilgan bolalar va o‘smirlar sport maktablari hamda bolalar va o‘smirlar sport maktablari, shuningdek har bir hududdagi olimpiya zaxiralari kollejlarida murabbiylik foaliyatini olib borayotgan o‘qituvchilar Universitet bitiruvchilari hisoblanadi.

Hozirda ham Andijon, Surxondaryo va Navoiy viloyatlaridagi sport taʼlim muassasalari uchun murabbiy-o‘qituvchilarini tayyorlash ko‘zda tutilgan bo‘lib, ushbu hududlarga 5 nafar bakalavr va 2 nafar magistr talabalarni ishga yuborish bo‘yicha taqsimot qilingan.

Jizzax shahrida velosportning BMX yo‘nalishi bo‘yicha jahon standartlariga javob beradigan trassa qurilishi yakuniga yetkazilgan. Ushbu BMX velopark majmuasiga Universitet bitiruvchilaridan 2 nafar yosh malakali mutaxassis jalb etilgan.

Bundan tashqari qarorda ko‘rsatib o‘tilgan Respublika velosport mahorat maktab-internati, qo‘shimcha 25 ta bolalar-o‘smirlar sport maktablari, sportning o‘yin turlari va yengil atletikaga ixtisoslashtirilgan bolalar-o‘smirlar sport maktablarida tashkil etiladigan velosport turlari bo‘yicha bo‘limlari hamda Buxoro, Qarshi, Navoiy va Termiz olimpiya zaxiralari kollejlarida ochiladigan velosport bo‘limlariga malakali murabbiy kadrlarni tayyorlab berish masalasi nazoratga olingan. Bu bo‘yicha zarur tashkiliy va amaliy ishlar olib borilmoqda.