Yangi O‘zbekistonning yangi g‘alabalari

Tokio Olimpiadasi yakunlari mustaqil mamlakatimiz shon-shuhratini yana bir bor dunyoga taratdi desak, mubolag‘a bo‘lmaydi. “Mard maydonda ko‘rinar” deganlaridek, sportchilarimiz murosasis bellashuvlarda o‘zlarining mahoratlarini namoyish etish barabarida, xalqimizga xos jasorat va matonat, halollik, raqibga hurmat namunalarini ko‘rsatib, yuksak eʼtirofiga sazovor bo‘ldilar.

Olimpiadada sportchilarimiz yuksak shohsupaga ko‘tarilib, 3 ta oltin va 2 ta bronza medalni qo‘lga kiritdilar.

Shubhasiz, bu Vatanimiz mustaqilligining 30 yillik shonli bayramiga munosib sovg‘a bo‘ldi.

Bugun yana nigohlarimiz Tokioda bo‘lib o‘tayotgan XVI yozgi Paralimpiya o‘yinlariga qaratilgan. Paralimiyachilarmiz tomonidan ko‘rsatilayotgan jasorat va qahromonliklar, baxtiyor lahzalar shukuhi qalblarimizni chulg‘ab olmoqda.

Paralimpiya o‘yinlarida 48 nafar parasportchimiz Tokio sport maydonlarida 8 ta sport turida g‘oliblik uchun kurash olib borishmoqda.

Qahramonlarimiz tomonidan shu kungacha 5 ta oltin, 4 ta kumush va 5 ta bronza medallari qo‘lga kiritildi.

Quvonarlisi, O‘zbekiston davlat jismoniy tarbiya va sport universitetining ikkinchi kurs talabasi Boburjon Omonov Paralimpiya rekordini yangilagan holda oltin medalga sazovor bo‘ldi. Boburjon yadroni 14.06 metr masofaga uloqtirishga muvaffaq bo‘ldi. Bu borada jahon rekordi ham aynan Omonovga tegishli. Boburjon BAAda bo‘lib o‘tgan jahon chempionatida 14.31 metr natija qayd etgan holda rekord o‘rnatgan edi.

Ayollar o‘rtasida para yengil atletikaning nayza uloqtirish turida F13 klassida hamyurtimiz Nozimaxon Qayumova 42.59 metr natija bilan oltin medalni qo‘lga kiritdi. Nozimaxon Qayumova Rio-2016 yozgi Paralimpiya o‘yinlarida ham oltin medalni qo‘lga kiritgan edi.

Barcha sovrindor bo‘lgan matonatli, jasur sportchilarimizni ajoyib g‘alaba bilan O‘zbekiston davlat jismoniy tarbiya va sport universiteti jamoasi nomidan muborakbod etaman. Sportchilarning Ota-onalariga, ustozlariga va albatta O‘zbekiston paralimpiya federatsiyasiga minnatdorchilik izhor etamiz.

XVI yozgi Paralimpiya o‘yinlari ishtirokchilariga omad va zafarlar tilagan holda, yurtimizga yorug‘ yuz bilan qaytishini, xalqimiz, Prezidentimiz ishonchlarini oqlashi uchun bor mahoratlarini ishga solishga chaqirib, g‘alaba yor bo‘lishini tilab qolaman!

Mahmudjon Boltabayev

O‘zbekiston davlat jismoniy tarbiya va

sport universiteti rektori, professor